ដាណឺម៉ាក នឹងមិនព្រមចុះចាញ់សម្ពាធរបស់លោក ត្រាំ ជុំវិញបញ្ហាកោះ Greenland ឡើយ(Video នៅខាងក្រោម)

 (កូប៉ិនហាក)៖ នាយករដ្ឋមន្ត្រីដាណឺម៉ាក លោកស្រី Mette Frederiksen បានប្រកាសនៅថ្ងៃព្រហស្បតិ៍ ទី៥ ខែមិថុនា ថា ប្រទេសដាណឺម៉ាកនឹងមិនព្រមចុះចាញ់នឹងសម្ពាធ «ដែលមិនអាចទទួលយកបាន» ពីសហរដ្ឋអាមេរិក ទាក់ទងនឹងការគ្រប់គ្រងលើដែនដី Greenland ដែលមានស្វ័យភាពពាក់កណ្តាលនោះទេ ដោយព្រមានថា សិទ្ធិសម្រេចចិត្តដោយខ្លួនឯងរបស់ប្រជាជន Greenland កំពុងស្ថិតក្នុងហានិភ័យ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។

ថ្លែងក្នុងសុន្ទរកថាសម្រាប់ទិវាជាតិដាណឺម៉ាក លោកស្រី Frederiksen បានមានប្រសាសន៍ថា «ប៉ុន្មានខែថ្មីៗនេះ Greenland និងដាណឺម៉ាក បានទទួលរងសម្ពាធដែលមិនអាចទទួលយកបានពីសម្ព័ន្ធមិត្តជិតស្និទ្ធបំផុតរបស់យើង (សហរដ្ឋអាមេរិក)»។ លោកស្រីបានបន្ថែមថា គោលការណ៍ជាមូលដ្ឋានក្នុងទំនាក់ទំនងឆ្លងអាត្លង់ទិក ដូចជាអធិបតេយ្យភាពជាតិ ការគោរពព្រំដែន និងសិទ្ធិសម្រេចដោយខ្លួនឯងរបស់ប្រជាជន កំពុងស្ថិតក្នុងគ្រោះថ្នាក់។ «ប៉ុន្តែយើងមិនព្រមឱនក្បាលទេ... យើងជនជាតិដាណឺម៉ាកមិនធ្វើបែបនោះទេ»។