ទីក្រុងដូហា៖ បន្ទាប់ពីអ៊ីស្រាអែលវាយប្រហារទៅលើកន្លែងស្នាក់នៅរបស់មេដឹកនាំក្រុមហាម៉ាស់នៅប្រទេសកាតាប៉ុន្តែមិនបានសម្រេច អាមេរិកបានចេញមកបញ្ជាក់ថាខ្លួនគ្មានជាប់ពាក់ព័ន្ធនឹងរឿងនេះទេ។ មានន័យថាអ៊ីស្រាអែលធ្វើឡើងតែម្នាក់ឯងប៉ុណ្ណោះ។ លោកត្រាំថ្លែងថាលោកមិនសប្បាយចិត្តទាល់តែសោះនៅពេលទទួលដំណឹងស្ដីពីការវាយប្រហារនេះ ហើយលោកនឹងចេញសេចក្ដីថ្លែងការណ៍ពិស្ដារនៅយប់នេះ។ លោកថ្លែងថាសភាពការណ៍ហាក់ដូចជាមិនសូវល្អទាល់តែសោះ។ លោកចង់ឃើញចំណាប់ខ្មាំងវិលត្រឡប់មកវិញ។ ប៉ុន្តែលោកខកចិត្តយ៉ាងខ្លាំងនឹងហេតុការណ៍ដែលទើបតែកន្លងផុតទៅថ្មីៗនេះ។
អ៊ីស្រាអែលថ្លែងការពារចំណាត់ការរបស់ខ្លួននៅក្នុងការវាយប្រហារនេះ។ ប៉ុន្តែរដ្ឋាភិបាលកាតាយល់ថាអ៊ីស្រាអែលមានគំនិតទុច្ចរិត និងចូលរួមនៅក្នុងការប្រព្រឹត្តអំពើភេរវកម្ម។ នាយករដ្ឋមន្ត្រីកាតាថ្លែងថាការវាយប្រហារតាមអាកាសនោះធ្វើឱ្យប៉ះពាល់កិច្ចខិតខំប្រឹងប្រែងស្វែងរកសន្តិភាពដែលមានប្រទេសកាតាជាអ្នកសម្របសម្រួលការចរចាគ្នារវាងហាម៉ាស់ និងអ៊ីស្រាអែល។
លោកត្រាំទទួលស្គាល់ថាការតាមកម្ចាត់ក្រុមហាម៉ាស់ជាគោលដៅដែលត្រូវតែធ្វើពិតមែនហើយ។ ប៉ុន្តែទន្ទឹមនឹងនោះលោកយល់ថាការដែលអ៊ីស្រាអែលវាយប្រហារចូលទៅក្នុងទឹកដីនៃរដ្ឋនៅឈូងសមុទ្រអារ៉ាប់ជាកំហុសឆ្គង។ កាតាជាសម្ព័ន្ធមិត្តរបស់អាមេរិក និងជាកន្លែងស្នាក់អាស្រ័យនៃមេដឹកនាំនយោបាយប៉ាឡេស្ទីន។ ប្រទេសមួយចំនួនប្រកាសថ្កោលទោសអ៊ីស្រាអែល។ ក្នុងនោះមានអារ៉ាប៊ីសាអូឌីត, អេហ្ស៊ីប, អារ៉ាប់រួម និងសហភាពអឺរ៉ុប។
គួរកត់សម្គាល់ថាការវាយប្រហារនោះកើតឡើងក្រោយអំពើភេរវកម្មនៅទីក្រុងយេរូសាឡឹមដែលប្រព្រឹត្តឡើងដោយជនប្រដាប់អាវុធប៉ាឡេស្ទីន២នាក់បណ្ដាលឱ្យស្លាប់មនុស្ស៦នាក់។ នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ អះអាងថាអ៊ីស្រាអែលវាយប្រហារទៅលើទីតាំងស្នាក់នៅរបស់មេដឹកនាំហាម៉ាស់នៅកាតាជារឿងសមហេតុផលបំផុតដើម្បីឆ្លើយតបទៅនឹងអំពើភេវកម្មនៅយេរូសាឡឹម និងការស្លាប់ទាហានអ៊ីស្រាអែល៤នាក់នៅហ្កាហ្សា។ នេះបើយោងតាមប្រភពពីរ៉យទ័រ និងប្រភពដទៃទៀត៕